O‘zbekiston Respublikasining Davlat ramzlari
Davlat ramzlari — davlat suvereniteti va mustaqilligining timsoli. Ularga hurmat bilan munosabatda bo‘lish har bir fuqaroning burchidir.
Asosiy ma’lumotlar
- Qabul qilingan
- 1991-yil 18-noyabr
- Qonun
- «O‘zbekiston Respublikasining Davlat bayrog‘i to‘g‘risida»gi Qonun, 407-XII-son
- O‘lchami
- 250 × 125 sm (2 : 1)
- Ranglari
- to‘q moviy, oq, to‘q yashil; qizil hoshiyalar
Davlat bayrog‘i
O‘zbekiston Respublikasining Davlat bayrog‘i O‘zbekiston Respublikasi davlat suverenitetining ramzidir. Davlat bayrog‘i xalqaro munosabatlarda O‘zbekiston Respublikasining timsoli bo‘ladi.
Tavsifi
Davlat bayrog‘i — bayroqning butun uzunligi bo‘ylab o‘tgan to‘q moviy rang, oq rang va to‘q yashil rangli uchta endan tarkib topgan to‘g‘ri to‘rtburchak shaklidagi matodir.
Bayroqning uzunligi 250 santimetrga, kengligi 125 santimetrga teng. Moviy, oq va yashil rangli enlarning kengligi bir xil — har biri 40 santimetr. O‘rtadagi oq enning chetlaridan kengligi 2,5 santimetrga teng qizil hoshiyalar o‘tkazilgan.
Yuqoridagi moviy enning yuz va orqa tomonida, dastaga yaqin joyida oq rangli yangi oy va uning yonida o‘n ikkita oq rangdagi besh qirrali yulduz tasvirlangan.
Ramziy ma’nosi
- Moviy rang
- tiriklik mazmuni aks etgan mangu osmon va obihayot ramzi.
- Oq rang
- muqaddas tinchlik, poklik va musaffolik ramzi.
- Yashil rang
- tabiatning yangilanish ramzi.
- Qizil chiziqlar
- vujudimizda jo‘shib oqayotgan hayotiy qudrat irmoqlarini anglatadi.
- Yangi oy
- tarixiy an’analarimiz bilan bog‘liq bo‘lib, qo‘lga kiritilgan mustaqilligimiz ramzi.
- O‘n ikki yulduz
- tarixiy an’analar va qadimiy yil hisobi bilan bog‘liq; xalqimiz madaniyatining qadimiyligi, yurtimizda komillik va saodatga intilishni ifodalaydi.
Manba: www.mintrans.uz